Ibalik ang Mendiola sa Taong-Bayan!

Sapat na ang imahe ng pambabasa na ginawa ng mga pulis sa Mendiola noong nakaraang Biyernes. Que religous, que pulitikal man ang rally. Que hanggang San Sebastian lang ang kanilang permit. Hindi pa rin makatarungan ang pagbabarikada ni Arroyo sa Mendiola.

Ang kapal naman ng mukha ni Gloria na pigilan ang mga kilos-protesta sa Mendiola. Aba'y kung hindi dahil sa mga ganitong kilos-protesta, hindi mapaaalis si Marcos, hindi mapaaalis si Erap, at hindi siya maluluklok. Walang utang na loob!

Sapat na ang lahat ng ito upang mag-init ang ulo mo bawat araw.

Tama na! Sobra na! Ibalik ang Mendiola sa Taong-Bayan! Ibalik ang katinuan sa bansa! Patalsikin si Gloria!

Burgis na Kalungkutan sa Kahabaan ng C-5

Malupet ang bagong video ng Sandwich - "Masilungan." Malupet dahil malungkot. Pero hindi ito y'ung lungkot na nararamdaman sa pagkawala ng isang minamahal o dulot ng matinding sakit. Kakaiba, hindi ko maipaliwanag nang maayos pero kuhang-kuha ng video y'ung lungkot na iyon.

Ito y'ung lungkot na bumabalot sa iyo habang nagmamaneho ka sa C-5 nang madaling-araw - mag-isa. Halos wala kang kasabay sa daan at wala ring makausap sa loob ng sasakyan. Pinagmamasdan mo ang mga ilaw at billboard ng Metro Manila. Ganoong uri ng lungkot - napakaburgis. *nakangisi*

Punung-puno y'ung video ng mga imahe ng burgis na kalungkutan. Kayo na bahalang mag-abang sa MTV o sa MYX, bahala kayo, nang makita ninyo para sa inyong sarili. Pero anu't anupaman, gusto ko y'ung video. Marahil dahil nakaka-relate ako sa kaburgisang ito. At totoo naman, lagi ko itong nararamdaman. Bagamat iniiwasan ko ang kaburgisan sa buhay, e...ganun talaga. Iyan ang uri kong pinagmulan. Sinusubukan naman nating bakahin. *mas malaki pang ngisi*

Pansamantala, magpapakasaya muna ako sa aking kalungkutan habang nagmamaneho sa kahabaan ng C-5.

tula tungkol sa pagsakay sa traysikel

Hanggang ngayon, nawiwirduhan pa rin ako sa "pangatlong upuan" sa loob ng sidecar ng isang traysikel. Isang kakaibang karanasan sa tuwing doon ako nauupo. At dahil rito, naisipan ko dating gumawa ng tula tungkol sa karanasang ito...isa sa mga iilang pagkakataong tinangka at "nagtagumpay" akong makapagsulat ng tula. And in fairness, wala pa siyang katuturan. Nai-post ko na ito dati sa forums ng Matanglawin pero dahil sa wala akong mailagay sa blog ko, i-po-post ko na lang ulit.

Alanganin

Pakiramdam ko,
ako ang
ikatlong pasahero

sa loob ng
masikip na sidecar ng isang
traysikel;

katabi ng
dalawang
lalaking nagtatalik,

pilit na isinisiksik ang puwit
sa isang posisyong
alanganin.