Alanganin...ang Pagbabalik (Ikalawang Bahagi)

(pagpapatuloy)

Pahabol...may isa pa palang pangit na puwesto sa dyip. Ito yung ikalawang pasahero sa likod ng drayber. Ang nakaupo kasi roon ang siguradong opisyal na taga-abot ng bayad at sukli. At hindi yung direktang nasa likod. Hehe. Salamat sa kapatid kong si melchor para sa puntong iyon.

2. bus: Huling inuupuan lagi y'ung magkatapat na upuan na may malaking "umbok" sa sahig. Ito kasi y'ung direktang nasa itaas ng likod na gulong ng bus - kaya mayroong "umbok" doon. Alanganing umupo rito kasi halos tumama na ang mga tuhod mo sa iyong mukha dahil sa taas ng umbok na pinagpapatungan ng iyong mga paa. Pero mas bad trip kung pantatluhan ang upuang iyon at saktong napuwesto ka sa gitna. Ang isang paa mo, nakasampa sa umbok, tapos nakasayad naman sa sahig ang isa. Tapos tagal pa ng biyahe, at hindi ka makahanap ng ibang upuan. Tae.

3. traysikel: No contest. Pinaka-alanganin talaga ang ikatlong pasahero sa loob ng sidecar. Saket sa puwet.

Alanganin...ang Pagbabalik (Unang Bahagi)

May mga alanganing posisyon sa mga sasakyan. Alanganin dahil hindi masyadong komportable ang maupo roon kumpara sa ibang upuan. Dahil rito, ang mga alanganing posisyong ito ang huling inuupuan ng mga pasahero. Heto ang ilan sa kanila:

1. dyip: upuan sa harap, sa gitna ng drayber at ng isa pang pasahero. alanganin yan dahil bukod sa masikip wala ka pang mahawakan o matukuran ng paa. Kung medyo masuwerte ka at barumbado ang drayber, siguradong mag-si-swimming ka sa windshield kapag biglang prumeno ang dyip habang tumatakbo ng mabilis. Alanganin din dahil kadalasan, tumatama ang kambyo sa binti mo habang nagmamaneho ang drayber. At nakupow! Kung babae ka pa, at medyo nakikita ang magaganda mong hita dahil sa maikli mong palda, at nasuwertehan mo pang nakursunadahan ka ng drayber, dyuskupo. Baka iba ang makambyo.

Isa pa sigurong alanganin na posisyon sa dyip y'ung nasa dulong pinakamalayo sa estribo at malapit sa harap. Bakit kamo? E, di tumatakbo kayo nang mabilis, mabilis pa sa pagdami ng mga kunehong nangangating magpadami. At sa sobrang bilis, e biglang magpepreno ang drayber dahil may dumaang nangangating kuneho sa daan at muntik na niyang masagasaan...Ayun. Tilamsik lahat ng puwersa ng mga siyam na pasahero paunta sa iyo. Ipit ang puri mo!

(itutuloy)

Go Where the Market Is

Balentayms na naman!

At dahil nalalapit na ito, pihadong magsusulputan na naman sa mga lansangan ang mga nagbebenta...oops...Hindi yan nagbebenta ng laman o naglalako ng mga bigateng promo para sa mga motel, kundi yung mga nagbebenta ng mga bulaklak.

Tuwing Valentine's lang naman iyan. Kapag ordinaryong araw naman kasi, wala namang naglalako ng mga roses sa daan. Puro diyaryo, yosi, at kendi from your friendly takatak boys. O di kaya, mga mani! (Hindi yung maning iniisip mo.), kundi yung nilagang maning nakasakay sa higanteng lalagyang tinutulak ni manong o yung adobong maning nagsiksikan sa baldeng iniaakyat sa mga humihintong bus.

Ganyan ang mga bentahan sa kalsada sa karaniwang araw. Pero minsan, nawindang ako nang makakita ako ng naglalako ng fishing rod (as in yung pangmayamang tatay na ang hobby niya, e angling. sosyal.) sa daan. Ganoon na ba kataas ang purchasing power ng mga Pinoy, at nagbebenta na lang ng mga mamahaling pamingwit sa kalsada? Kung sabagay sa bandang Ortigas ko nakita iyon. At doon din, naka-ispat ako ng lalaking nagbebenta ng bolang pam-basketbol. Akalain mo. Sayang nga lang at hindi ko na nakikita ang mga 'yun. Sana sa susunod, may iPod nang inaalok sa mga drayber na parang yosi lang.

And to think, na medyo wirdo na ang pagbebenta ng papag sa lansangan.

Keep Ticket for Inspection

Kung sinuman ang makapagsasabi sa akin kung paano ang sistema sa mga tiket ng bus, e tatanawin ko siya ng habambuhay na utang na loob.

Matagal na akong nahihiwagaan, e. Paano nalalaman ng mga konduktor at inspektor na tama lang ang binayaran mo sa pamamagitan ng pagtingin sa tiket na magkakapareho lang naman ang hitsura? Kunwari galing ka sa Commonwealth at papunta kang Ortigas. Puwede mo namang sabihin sa konduktor na bababa ka lang sa Cubao para hindi malaki ang babayaran mo. Hindi naman madalas na tinitingnan ang tiket. At kung meron mang inspektor (na iba sa konduktor), ang ginagawa lang niya, e, punit-punitin ang mga tiket. At yun ang lalong mahiwaga. Anong sistema ang nasa likod ng pagpupunit ng tiket? Malalaman ba ng inspektor na napulot mo lang yung tiket sa loob ng bus at nagamit na iyon ng isa pang pasahero kanina pang umaga? Anong meron sa hiwaga ng punit na tiket?

Pakshet.

Gusto kong maging konduktor.