Crossroads

Sa wikang Ingles, sinasabing nasa "crossroads" ang isang taong nalalagay sa sitwasyon kung saan kailangan niyang gumawa ng malalaking desisyon. Ito ang mga pagpapasyang huhubog sa buhay ng taong iyon. "No turning back," ika nga.

Sinusubukan kong maghanap ng kataga sa wikang Filipino na maaaring tumumbas sa metapora ng "crossroads." Parang wala yatang ganun. Hindi nga ako makaisip ng simpleng salin. Kanto ng mga kalye? Interseksyon? Pagku-krus ng landas? Teka, malayo na yata iyon. Kung meron mang nakaaalam ng magandang salin, mangyari lamang na ipagbigay-alam sa akin.

Pero siyempre, hindi imperative ang maghanap ng tutumbas na salin o metapora, ng isang istriktong one-to-one correspondence. Kung meron namang katutubong talinhagang swak ang pagsasalarawan sa karanasang nais isalarawan, bakit hindi ito ang gamitin?

Kunwari...

...

Tae, wala akong maisip...

...Pero sigurado akong malulusutan natin ito.

Big BF is watching...

Hindi raw ito pangangampanya o pamumulitika. Ewan ko lang, ha. Nagkalat ang mukha ni Bayani Fernando sa buong Kamaynilaan, hindi ba iyan lantad na pangangampanya? Pweh.

Sabi ng mga magiliw na lingkod ng bayan sa MMDA, kasama sa mensaheng nais nilang iparating sa mga motorista at mamamayan ng Metro Manila ang paglalagay ng mukha ni BF. Para raw tumalab sa kanila ang disiplinang nais nilang ipatupad. Kung nangangampanya raw si BF, dapat nakangiti siya sa larawan at hindi mukhang tatay na iniisip kung tsinelas o sinturon ang ipampapalo sa kanyang anak na nakabasag ng plorera.

Hay, naku...Lahat na lang ng palusot. Akala ko pa naman e garapal na si Eusebio sa paglalagay niya ng letrang "E" sa buong Pasig. Akala ko pa naman e garapal na si Sonny Belmonte sa pambibida niya sa katagang Serbisyong Bayan sa bawat karatula sa Quezon City. Akala ko pa naman e walang kiyeme itong si Bayani sa kanyang pagdedeklarang gusto niyang tumakbo sa 2010, hindi gaya ng ibang pulitiko na ayaw pang umamin kahit halata naman. Mali pala ang aking akala.

Pasalamat na lang talaga tayo, hindi nakangiti si BF sa kanyang mga poster.

Disguised Discount

Speaking of Sogo, nakakaaliw rin ang kanilang pakulo pagdating sa discount cards. Sa halip na nakalagay ang pangalan ng Sogo sa card, pinagmukha nila itong isang "innocent-looking" card. Sa isang side, nakalista ang ilang mahahalagang Emergency Numbers. May number ng pulis, National Poison Control, Meralco, Bantay Bata (huh?) at ilang ospital. Sa likod naman nito, makikita ang mapa ng tatlong light railway transits sa Metro Manila (MRT, LRT 1 at LRT 2). Nakadetalye ang lahat ng istasyon ng bawat tren. Hmmm...e akala ko ba discount card ito ng Sogo?

Kapag tiningnang maigi ang mapa ng tatlong tren, makikita na may mga letrang S na nakasulat katabi ng ilang istasyon. Siyam lahat-lahat ng letrang S. At kung medyo matalas ang iyong paningin kapag nakasakay ka sa bus at mayroon kang magandang memorya, mahuhulaan mo agad na ang mga letrang S na ito ay tumutukoy sa mga branch ng Sogo sa buong Kamaynilaan. Sa discount card na ito, hindi makikita kahit isang beses ang buong pangalan ng Sogo. Ang tanging bakas lamang na hindi "wholesome" ang card na ito ay makikita sa mga letrang "S" at sa mga sinag ng araw (Y'ung araw na parang simbolo ng mga Hapon na siya ring ginagamit na logo ng Sogo.) na makikita sa side na mayroong emergency numbers, doon sa lower left right corner. Kapag pumunta ka sa Sogo, malalaman ng nasa front desk na authentic discount card ito dahil sa isang barcode na matatagpuan naman sa lower left corner katabi ng logo ng araw.

Wais no? Kapag may naghalungkat ng wallet mo at nakita ang discount card na iyan, aakalain lang niya na tiket iyon sa MRT at hindi iisiping parokyano ka ng mga mot-mot. Wais talaga. Pero iyon ay kung di pa niya nababasa ang post na ito...

Color Combination

Para sa isang mulat na taga-Maynila, hindi maitatanggi na mayroong reputasyong nakakabit sa kalsadang kilala sa tawag na Quezon Avenue. Subukin nating gumawa ng concept map. Ilatag lahat ng establishments na naaalala mo tuwing dadaan (Talaga bang dumadaan ka lang doon?) maaaring iugnay sa naturang kalye para makita ang common denominator: Mahalikaya, Pegasus, Classmates, Stardust, at meron pa pala...Jollibee.

Jollibee??? Tanong mo marahil. Anong kaugnayan ng higanteng pulang bubuyug sa kalibugan ng mga nailista nating "business establishments" (na source of tax income pala para sa QC City Government)? Heto ang surpresang sagot.

Ang Jollibee na sa kanto ng Pantranco. Ilang hakbang lang ang layo nito mula sa Classmates. Wala naman masyadong nakatatawag-pansin sa hitsura ng Jollibee na ito. Pero sa isang malapitang pagsusuri, ikagugulat mo ang makikita mo sa bandang itaas...

Magkasalo sa iisang gusali ang Jollibee at Sogo. Jollibee ang nasa ibaba habang Sogo ang tumitira (pun intended) sa mga palapag sa itaas. Parang ang pangit ng kombinasyon, ano? Pero kung mapapansin, magandang tambalan ito kung kulay lang ang pag-uusapan. Red and yellow color scheme. Sogo at Jollibee. Langhap-sarap na, mura at malinis pa. Saan ka pa?

Puwede ka pang magpalusot sa misis mo..."Honey, makikipagkita lang ako kay 'kumpare' sa Jollibee Quezon Ave." Kung alam lang ni misis...Ibang Chickenjoy na pala ang tinitira ni mister. Tsk tsk.